​Աֆրիկյան կամ կասպյան մարգարտածաղիկ. ankakh.com

Գեղեցիկ և էկզոտիկ ծաղիկների թվին պատկանող այս բազմամյա կիսաթուփը ծագումով Հարավային Աֆրիկայից է: Այս ծաղիկն անսովոր գեղեցիկ ձև և գույներ ունի: Նրա միջուկը վառ կապույտ գույնի է` պսակավորված դեղին գույնով, իսկ ծաղկաթերթիկները մանուշակավարդագույն են, սպիտակ, բաց շագանակագույն, բաց մանուշակագույն և այլն:

Մեր տարածաշրջանում այս ծաղիկը հազվադեպ է հանդիպում: Կասպյան մարգարտածաղիկը կամ օստեոսպերմումը պատկանում է աֆրիկյան երիցուկների թվին:

Նրանց աճի համար լավագույն տարբերակը պարարտ և փխրուն հողն է: Ցանկալի է պահել տաք և արևաշատ վայրում: Անհրաժեշտ է ծաղիկը ժամանակին ջրել, որպեսզի բնահողը չչորանա, սակայն կարիք չկա նաև չափազանց շատ ջրել:

Հարկավոր է չմոռանալ պարտարտանյութի և անհրաժեշտ խնամքի մասին: Այդ դեպքում սովորական երիցուկների հետ միասին հունիսից մինչև հոկտեմբեր կարող են ծաղկել նաև աֆրիկյան մարգարտածաղիկները:

Բազմացումը` սերմերով

Եթե ձեզ համար կարևոր է տեսակային հատկանիշների պահպանումը, ապա այս խորհուդը ձեզ համար չէ, քանի որ կարող եք դրանք բազմացնել վեգետատիվ ճանապարհով:

Իսկ եթե տեսակի հատկությունները նշանակություն չունեն, ապա կարելի դա իրականացնել տնկիների միջոցով, քանի որ այդ բույսի սերմերը լավ են ծլում:

Այս ծաղկի բազմացմամբ կարելի է զբաղվել գարնանը` մարտի վերջին կամ ապրիլի սկզբին:

Աֆրիկյան մարգարտածաղիկը կարելի է տնկել թեթև ավազով բազմացման արկղերում: Հարկավոր է դրանք ոչ շատ խիտ ցանել` գրեթե 0.5 սմ. հեռավորության վրա, այնուհետև արկղը տեղափոխել տաք և լուսավոր որևէ վայր, որտեղ 20°C է: Գրեթե մեկ շաբաթ անց հայտնվում են ծիլերը:

Կասպյան մարգարտածաղիկները կարելի է տեղափոխել մոտավորապես մայիսի վերջին: Բույսի արմատները չվնասելու նպատակով հարկավոր է սածիլներն արկղից տեղափոխել մեծ հողի գնդով: Տնկելիս բույսերի միջև հարկավոր է մշտապես պահպանել առնվազն 25 սմ հեռավորություն:

Հարցեր, պատասխաններ, մեկնաբանություններ